03‏/05‏/2008

انا هشة !!!!


انا بقيت هشة

من برة ممكن تحس اني اصلب الناس

من جوايا اقل نسمة ممكن تكسرني


عايشة في عالم برسم فيه حواجز و حدود و ابعاد و بعمل عوااااااازل كتير
مش عشان النتاس و كلامهم عني

لا عشان احمي نفسي مني من هشاشتي .. رقتي و ساعات ضعفي


قسوة الدنيا صحيح علمتني لكن كتر القسوة خلاني ضعيفة
لاني بحن لكلمة حب للحظة لدقة قلب و لروح تحضني

خايفة فيوم اهرب مني و الاقيني باذي نفسي عشان حد اوهم نفسي بيه
و اقول بيحبني و الاقيني انا اللي عايزة احبه و هو و لا على باله
بس عشان بحن للحب بخلق لنفسي وهم حبي ليه و حبه ليا

قدام الناس انا استحالة اغلط او اضعف او اسيب نفسي لقلبي يسرق مني عقلي
لكن قدام نفسي عارفة اني مفيش اضعف مني و ان الحب بيتوهني
بيبقى الآمر الناهي علية و على قلبي و تصرفاتي و مقدرش انفذ امر لغيره
كلمة لا بنساها من قاموسي و بمشي و راء رغباته


!!!! علشان كدة حواليا سوووووور من الحواجز و خايفة بجد لو يوم اتمرد علية قلبي و عداها
خايفة لو قرر انه يثور و يهدها
خايفة مع اول دقة لاقرب فرصة حب يصحى فيه حنينه للحب و يجري على الحياة و يكسر كل الحواجز
خايفة لانه مع حنينه للحب عمره ما حيختار القلب اللي بيحبه لا حيجري و يرمي نفسه فحضن اقرب قلب يدق لحبه

خايفة مني و علية

هناك 9 تعليقات:

غير معرف يقول...

مبروووووووووك المدونة

ثانيا بقى فجمهور الأهلي بيقولك ايه.. بيقول اللي خايف يروح

كله بأوانه .. الحب هو اللي هيلاقينا مش احنا اللي هنلاقيه

غير معرف يقول...

عندك حق

و تسلم ايدييييك

المدونة حلوة عشان انت اللي عملتهالي

غير معرف يقول...

خايف اصدق امل جوايا ......

غير معرف يقول...

انا بعد كده مش هتابع غير بلوج فنون هى اللى عندها كل التطورات بتاعت البلوجز الجداد:D:D
مبروك المدونة و انا عجبنى اوى الموضوع ده امبارح و كويس انك جبتيه هنا عشان انا واخدة اجازة من هناك حتى اشعار اخر:))

احساسك مش طبيعى بجد حاجة متتوصفش بالكلام و مع انى عكسك تماما فى النقطة دى الا انى مقدرتش متأثرش بكل كلمة كتبتيها
و مرة تانية الف مبروك المدونة تقريبا كده كل الناس اللى بحترمهم فى ايجيفيلم موجودين هنا

غير معرف يقول...

اتكلمت صاحبتي ....

قالتلي صاحبتي ....

انا هنفجر

انا جوايا كمية حب تملى الكون .....

انا قلبي على اخره

انا نفسي الاقي حد اطلع فيه الحب دا كله

سرحت في كلام صاحبتي

وجعني كلام صاحبتي

حسيت كأن صاحبتي بتقول

حد عايز قلب فاضى.......قلب طيب قلب هادى
قلب كله حنان وعطف.......يخطفك من الحزن خطف

مستعد يحب حتى قلب... عايز ينسى ماضي
قلبى شارى مش ببيعه .. قلبى غالى مش حيرخص
قلبى لسه فى عز ربيعه .. بس نفسه فى قلب مخلص
قلب ناوى يحب حبيبه.... قد كل الناس ماتحبوا
واللى شوقه فى يوم حيجيبه .. يا هناه ويا فرح قلبه

وبجد يا هناه يا فرح قلبه

انتي يا صاحبتي قلبك جميل ومليان وحب انا مستخسراه في اي حد

هيجي ....هيجي اللي يستاهلك ....هيجي اللي يقدر كل الحب دا

انا بحبك يا صاحبتي


دا كنت كاتباه من فترة يجي شهرين ولا حاجة عنك يا لين :) بس ما نزلتهاش في المنتدى

غير معرف يقول...

بجد ربنا يبعد عنك أي شر..ولا تنضامي أبدا..زي ما ماما بتدعي

هو يعني ايه تنضامي :S


ربنا يعزك ويسعدك

غير معرف يقول...

نورتووني كلكم

بنوتة مصرية انا بجد سعيدة و فخورة اووووي بكلامك دة


ماجا و النبي تشرح اللي انت قلته دة لحسسسسسن المعاني المخفية كتيييييييير

فنون !!!!!!!!!! حرام عليكي انا دمعت و مخبية عني الكلام دة ليييه و كاتبة ايييه تاني؟؟؟


سما مصر تنضامي يعني تنظلمي و يااارب ما تنضامي ابداااااااا

غير معرف يقول...

يارب تلاقي اللي يخلي الخوف ده ميمسكيش تاني ويطمن قلبك :)

غير معرف يقول...

ياااااااااااااااارب جميعا